Pro 8:10-19 | SwhNEN | STEP | Chagua mafundisho yangu badala ya fedha, maarifa badala ya dhahabu safi,

Proverbs 8:10-19

10 ^aChagua mafundisho yangu badala ya fedha,
maarifa badala ya dhahabu safi,
11 ^bkwa maana hekima ina thamani kuliko marijani
na hakuna chochote unachohitaji kinacholingana naye.

12 ^c“Mimi hekima, nakaa pamoja na busara;
ninamiliki maarifa na busara.
13 ^dKumcha Bwana ni kuchukia uovu;
ninachukia kiburi na majivuno,
tabia mbaya na mazungumzo potovu.
14 ^eUshauri na hukumu sahihi ni vyangu;
nina ufahamu na nina nguvu.
15 ^fKwa msaada wangu wafalme hutawala
na watawala hutunga sheria zilizo za haki,
16 ^gkwa msaada wangu wakuu hutawala,
na wenye vyeo wote watawalao dunia.
17 ^hNawapenda wale wanipendao,
na wale wanitafutao kwa bidii wataniona.
18 ⁱUtajiri na heshima viko kwangu,
utajiri udumuo na mafanikio.
19 ^jTunda langu ni bora kuliko dhahabu safi;
kile nitoacho hupita fedha iliyo bora.